Aðalfundur
Aðalfundur badmintondeildar Aftureldingar var haldinn miðvikudaginn 28. apríl 2021. Á fundinum voru hefðbundin aðalfundarstörf og kosning stjórnar. Þær mannabreytingar urðu á stjórninni að Erla Sif Ástþórsdóttir gjaldkeri og Kristján Halldórsson meðstjórnandi, létu af störfum.
Stjórn
Ný stjórn var kosin á fundinum og skipti hún með sér verkum. Ný stjórn var sem hér segir:
Þorvaldur Einarsson formaður,
Ásta Jenný Sigurðardóttir gjaldkeri, Svanfríður Oddgeirsdóttir,
Sunna Karen Ingvarsdóttir
Sveinbjörn Pétur Guðmundsson meðstjórnendur.
Þjálfarar
Þjálfarar deildarinnar voru Árni Magnússon (yfirþjálfari), Andrés Ásgeir Andrésson, Sara Jónsdóttir og Bjarni Sverrisson.
Æfingar og iðkendur
Badmintondeild Aftureldingar samanstóð af 4 hópum, U9, U13, 13+ og Fullorðinshóp.
U9, 6-9 ára voru 13 skráðir iðkendur á vorönn og 14 á haustönn.
U13, 10-12 ára voru 23 skráðir á vorönn og 39 á haustönn.
+13, 13-19 ára voru 14 skráðir á vorönn og 18 á haustönn.
Fullorðinshópur, +19 ára voru 23 skráðir á vorönn og 29 á haustönn.
Alls voru því 73 skráðir iðkendur á vorönn og 100 á haustönn.
U9 hópurinn var með fastan tíma 1x í viku, U13 2x í viku og 13+ voru með 3 tíma í viku en þar af var einn kvöldtími þar sem æfingin endaði oft með spili með fullorðinshópnum.
Fullorðinshópnum er skipt upp í almennan fullorðinshóp annars vegar, og keppnishóp hins vegar. Almenni hópurinn var með tíma 2x í viku með þjálfara og kúlum en keppnishópurinn hafði aðgang að sömu tímum auk þess að vera með auka æfingatíma 2x víku, samtals 4x í viku.
Starfsemin
Árið hjá badmintondeildinni hefur verið viðburðarríkt hvað mótamál varðar og hafa bæði yngri og eldri iðkendur verið dugleg að mæta í þau mót sem hafa verið haldin á vegum annarra badmintonfélaga sem og badmintonsambands Íslands.
Vorönn
Vorönnin hófst í fyrstu viku í janúar 2021. Skráðir voru í heildina 73 iðkendur í deildina, þar af 50 í barna- og unglingastarfið. Það er aukning frá árinu áður og hefur þróun iðkendafjölda í deildinni verið frekar upp á við. Á vorönn er Íslandsmót Unglinga hápunkturinn en það mót var haldið að þessu sinni á Akranesi í húsakynnum badmintondeildar ÍA. Þar átti badmintondeild Aftureldingar fulltrúa í hreinum úrslitaleik í U15 flokki Sveina í B-flokk en Kird Lester Inso sigraði þar Ágúst Pál Óskarson en báðir æfa og spila með Aftureldingu. Dagbjört Erla Baldursdóttir sigraði svo U15 Meyja í B-flokki. Aðrir stóðu sig með prýði og er ljóst að framtíðin er björt hjá deildinni. Í fullorðinshópnum eru 2 hápunktar á vorönn en það er annars vegar Deildakeppni BSÍ og
hins vegar Meistaramót Íslands. Afturelding skráði sig með 2 lið í Deildakeppni BSÍ sem haldin var í TBR húsunum þann 26-28 febrúar. Afturelding var með sameiginlegt lið með TBR í A-deild sem gerði sér lítið fyrir og vann gullverðlaun. Afturelding skráði einnig til leiks lið í B-deild sem einungis var skipað Aftureldingarfólki og þar voru margir að stíga sín fyrstu skref í deildarkeppninni. Liðið náði flottum úrslitum á móti mörgum sterkum liðum en náði þó ekki á verðlaunapall þetta árið. Afturelding átti einnig fulltrúa í Meistaramóti Íslands sem fram fór þann 28-30 maí í TBR húsunum. Þar var Egill Þór Magnússon fulltrúi Aftureldingar á verðlaunapalli en hann krækti í silfurverðlaun í tvenndarleik í B-flokk ásamt Erlu Rós Heiðarsdóttur úr Badmintonfélagi Hafnarfjarðar. Vorönn deildarinnar lauk svo með fjölskyldusprelli á stekkjarflötinni þann 26 maí þar sem deildin grillaði pylsur og fór í leiki.
Haustönn
Haustönn hófst í byrjun september og varð mikil aukning í iðkendahóp deildarinnar. Félagið tók í notkun nýtt forrit, Sportabler, sem heldur utan um íþróttastarfið ásamt því að skipta um bókhaldsforrit svo það var mikil aðlögun fyrir stjórnendur deildarinnar, ásamt þjálfara, iðkendur og foreldra. Það hefur verið markmið deildarinnar í gegnum árin að fjölga iðkendum og breiða út starfið og það virtist vera að skila sér því á haustönn voru skráðir samtals 100 iðkendur, 71 í barna- og unglingastarfinu og 29 í fullorðinsstarfinu. Unglingamót Aftureldingar er haldið árlega að hausti til en ákveðið var að færa mótið yfir á vorönn 2022 en því miður þurfti á endanum að aflýsa mótinu vegna Covid 19. Badmintondeild Aftureldingar hélt þó í fyrsta sinn, Meistaramót UMFA helgina 23-24 október. Mótið fékk strax stöðu á mótaröð BSÍ sem gefur stig á styrkleikalista sambandsins. Mótið var vel heppnað en deildin fékk lánaðar mottur/velli hjá Badmintonfélagi Hafnarfjarðar og setti upp í sal 1 að Varmá. Góð þátttaka var á mótinu og stóð Aftureldingarfólk sig mjög vel en þar ber að nefna frábæran árangur hjá Sunnu Karen Ingvarsdóttur sem vann þrefalt í 2.deild.
Alexander Stefánsson vann tvöfalt í 2.deild í einliða og tvíliða en náði í silfurverðlaun í tvenndarflokki í 2.deild. Aðrir sem náðu í verðlaun á mótinu voru Arnar Freyr Bjarnason sem vann með Sunnu Karen í tvenndarleik 2.deild, Egill Þór Magnússon sem vann í tvíliðaleik með Alexander, og Margrét Dís Stefánsdóttir sem vann til silfurverðlauna með Alexander í tvenndarleik í 2.deild. Í Byrjun desember fóru nokkrir pabbar með krakkahóp á skemmtilegt mót hjá TBS á Siglufirði.
Ferðin vakti mikla lukku bæði hjá fullorðnum og svo krökkunum. Vinir okkar á Siglufirði redduðu gistingu og er skemmst frá því að segja að krakkarnir stóðu sig með prýði á mótinu og enduðu margir á verðlaunapalli. Þá var farið í gönguferð um Siglufjörð, farið í sund, keyrt til Ólafsfjarðar í pizzaveislu svo
eitthvað sé nefnt
Aðstaðan
Badmintondeildin hefur verið með æfingar í sölum 2 og 3 í Íþróttamiðstöðinni að Varmá og hefur fullorðinshópurinn verið með einn tíma í viku í Íþróttahúsinu í Lágafelli. Á haustönninni varð þó breyting á þar sem barna- og unglingastarfið var nánast alfarið fært yfir í Lágafell þar sem deildin fékk salnum þar breytt og bættist við völlur og voru þeir því orðnir 4. Krakkarnir voru því að æfa á þriðjudögum og fimmtudögum í Lágafelli fyrir utan U9 sem var bara á fimmtudögum. Unglingahópurinn fékk að auki eina æfingu á miðvikudagskvöldum í sal 2 að Varmá.
Fjármál
Badmintondeild Aftureldingar stendur vel hvað fjármálin varðar og hefur það verið svo undanfarin ár. Eiginfjárstaðan er góð og hafa tekjur deildarinnar staðið undir útgjöldum s.l. ár. Deildin hefur ekki verið að taka þátt í fjáröflunum en iðkendur hafa þó verið að taka þátt í fjáröflunum á vegum Aftureldingar. Tekjur deildarinnar samanstanda aðallega af æfingagjöldum, framlögum og styrkjum ásamt tekjum af mótahaldi. Stærsti útgjaldaliðurinn er laun og verktakagreiðslur, áhalda- og tækjakaup (aðallega fjaðraboltar) ásamt þátttöku í mótum.
Framtíðarstefna
Framtíðarstefna deildarinnar hefur verið svipuð undanfarin ár en hún er að breiða út íþróttina, fjölga iðkendum og lágmarka brottfall í barna- og unglingastarfinu sérstaklega. Þá hefur það einnig verið ákveðið markmið að auka gæði í þjónustu deildarinnar, bæði hvað varðar þjálfunarstarfið en einnig hvað varðar aðstöðuna og æfingatíma. Félagslegi þátturinn hefur einnig verið mikið í umræðunni og hefur stjórnin rætt mikið um að vilja virkja iðkendur í að skipuleggja viðburði fyrir hópana til að hrista fólk saman. Hluti af félagslega þættinum ekki síður en þjálfunarstarfinu er að fara í æfingaferðir með krakkana. Þetta hefur verið gert áður en ekkert síðustu misseri. Það er von stjórnarinnar að nú sé hægt að blása til sóknar í þessum efnum ásamt því að fara í fleiri keppnisferðir út á land og jafnvel út fyrir landsteinana.
F.h. stjórnar
Þorvaldur Einarsson
Fráfarandi formaður badmintondeildar Aftureldingar